Kom Gott schepfer heyliger geyst

Kom Gott schepfer heyliger geyst,
besuch das hertz der menschen deyn,
Mit gnaden sie füll wie du weyst,
Das deyn geschepff vorhyn seyn.

Denn du bist der tröster genand,
des aller höchsten gabe theur,
Eyn geystlich salb an uns gewand,
eyn lebend brun, lieb und feur.

Zund uns eyn liecht an ym verstand,
gib uns yns hertz der liebe brunst,
Das schwach fleysch ynn uns dyr bekand
erhallt fest deyn krafft und gunst.

Du bist mit gaben siebenfallt
der finger an Gotts rechter hand,
Des vaters wort gibstu gar bald
mit zungen ynn alle land.

Des feyndes list treyb von uns fern,
den frid schaff bey uns deyne gnad,
Das wyr deym leytten folgen gern
und meyden der seelen schad.

Ler uns den vater kennen wol,
dazu Jhesu Christ seynen Son,
Das wyr des glaubens werden vol,
dich beyder geyst zuuersthon.

Gott Vater sey lob und dem Son,
der von den todten aufferstund,
Dem tröster sey dasselb gethon
ynn ewigkeyt alle stund.

German Poetry App

This poem and many more can also be found in the German Poetry App.